Sejħa għal Espressjoni ta’ Interess għal Kordinatur tal-Avvenimenti fuq bażi Part-Time fi ħdan il-Malta International Contemporary Art Space (MICAS)

Nomenklaturi li jindikaw il-maskil jinkludu wkoll il-femminil.

Il-MICAS qed ifittex Kordinatur tal-Avvenimenti dinamiku u b’esperjenza fuq bażi part-time biex jaħdem mill-qrib mad-Dipartiment tal-Avvenimenti u l-Loġistika. Il-MICAS itella’ wirjiet, rappreżentazzjonijiet, funzjonijiet privati, konferenzi, u avvenimenti komunitarji, li jilqgħu udjenzi varji.

L-Isfond

Il-MICAS irid isaħħaħ l-infrastruttura kulturali ta’ Malta billi jipprovdi pjattaforma għall-arti kontemporanja u l-internazzjonalizzazzjoni.

Il-MICAS mhuwiex biss vetrina għall-artisti lokali kontemporanji imma jikkollabora wkoll ma’ istituzzjonijiet internazzjonali biex jippreżenta xogħlijiet innovattivi ta’ artisti rinomati minn madwar id-dinja. Il-MICAS għandu l-għan li jenerġizza pożittivament l-ekoloġija kulturali ta’ Malta u jħalli impatt fuq ir-reġjun Ewro-Mediterranju.

Il-missjoni tagħna hija li nippromwovu l-arti kontemporanja billi noħolqu kuxjenza pubblika dwar l-importanza tagħha fil-ħajja moderna, u biex nitfgħu dawl fuq kif l-arti u l-artisti jikkontribwixxu għal kif ninterpretaw u nsawru d-dinja li ngħixu fiha.

Il-MICAS huwa proġett ta’ legat infrastrutturali mill-Gvern ta’ Malta għas-settur tal-Kultura u l-Arti.

Is-Servizzi Meħtieġa

Il-MICAS qed ifittex Kordinatur tal-Avvenimenti motivat u b’għajn għad-dettall biex jgħin lit-tim tal-avvenimenti. Il-kandidat magħżul irid kun preżenti matul l-avvenimenti, l-aktar filgħodu kmieni, filgħaxija, u matul tmiem il-ġimgħa, biex jiżgura li l-aspetti kollha tal-operat jaħdmu ħarir. Il-Kordinatur tal-Avvenimenti jkun preżenti mill-bidu sal-aħħar, u jservi bħala l-persuna ewlenija li tikkollabora bejn il-klijenti, it-timijiet tal-manutenzjoni u l-operat, u l-Maniġer tal-Avvenimenti u l-Loġistika.

Dan huwa rwol dinamiku li jeħtieġ flessibbiltà, ħiliet eċċellenti ta’ komunikazzjoni, u l-kalma u l-professjonalità anki f’sitwazzjonijiet diffiċli.

Ir-Responsabbiltajiet Ewlenin

• Sorveljar tal-loġistika fuq il-post fi spazji tal-mużew, fosthom it-twaqqif, il-ġestjoni tal-avveniment fil-ħin li għaddej, u ż-żarmar.
• Ikun il-punt ewlieni ta’ kuntatt għall-klijenti, u żgurar li l-ħtiġijiet tagħhom jinqdew mill-ewwel u professjonalment.
• Kordinazzjoni mill-qrib mat-timijiet tal-manutenzjoni u l-operat għal żgurar ta’ avveniment mingħajr ebda problema.
• Moniteraġġ ta’ skadenzi, provvediment ta’ soluzzjoni għall-problemi, anki waqt li għaddejjin l-avvenimenti.
• Żamma mal-istandards tas-servizz tal-mużew u żgurar li l-klijenti u l-mistiedna joħorġu sodisfatti.
• Żamma ta’ rekords preċiżi dwar id-dettalji u r-rispons mogħti għall-avvenimenti, kif ukoll kitba ta’ noti operattivi għall-fini ta’ rappurtaġġ.
• Għajnuna lill-Maniġer tal-Avvenimenti u l-Loġistika permezz ta’ ppjanar u valutazzjonijiet wara l-avvenimenti.

Il-Ħinijiet tax-Xogħol

L-applikant magħżul se jintalab jaħdem sa 30 siegħa fil-ġimgħa skont il-ħtieġa, filgħodu kmieni, filgħaxija, fi tmiem il-ġimgħa u f’festi pubbliċi. Jista’ jkun ukoll meħtieġ jaħdem sigħat addizzjonali, fosthom filgħaxija u matul tmiem il-ġimgħa, speċjalment fit-tħejjija finali għal avvenimenti tal-MICAS jew matulhom.

Il-Ħiliet u l-Ħtiġijiet

Sad-data u l-ħin tal-iskadenza ta’ din l-Espressjoni ta’ Interess, l-applikanti jeħtieġ ikollhom:

• Esperjenza ta’ għaxar (10) snin fil-qasam tal-kordinazzjoni ta’ avvenimenti, tal-ospitalità, jew xi qasam relatat ieħor. Esperjenza f’postijiet kulturali u ta’ patrimonju titqies bħala vantaġġ.
• Kwalifika rikonoxxuta fil-Livell 5 tal-MQF fl-Ospitalità, it-Turiżmu jew il-Ġestjoni tal-Avvenimenti (suġġett għal minimu ta’ 60 krettu ECTS/ECVET jew ekwivalenti) ukoll titqies bħala vantaġġ.
• Ħiliet organizzattivi, provvediment ta’ soluzzjoni għall-problemi, u ta’ ħidma ta’ xogħlijiet differenti fl-istess ħin.
• Ħiliet interpersonali u komunikattivi eċċellenti.
• Liċenzja tas-sewqan valida.
• Kunfidenza fiż-żamma ta’ relazzjonijiet mal-klijenti u l-moderazzjoni tal-aspettattivi.
• Flessibbiltà għal ħidma filgħaxija, fi tmiem il-ġimgħa, u f’sigħat oħra irregolari kif meħtieġ skont l-iskeda tal-avvenimenti.
• Attitudni proattiva, u ta’ ħidma f’tim, kif ukoll il-ħila ta’ ħidma indipendenti meta meħtieġa.
• Ħakma tajba tal-Malti u l-Ingliż.

Kuntratt għat-Termini tas-Servizz

Il-Ħlas: Is-servizz jitħallas bir-rata ta’ €13.00 kull siegħa, il-VAT eskluża.

Il-Kuntratt: Dan huwa ‘Kuntratt għal Servizz’ ta’ tliet (3) snin li għandu l-possibbiltà jiġġedded għal sena waħda (1) oħra.

Il-Ħinijiet tax-Xogħol:

• L-iskeda tax-xogħol hija fuq bażi part-time, u fiha tingħata għajnuna fl-avvenimenti li jittellgħu filgħodu kmieni, filgħaxijiet, fi tmiem il-ġimgħa, u fil-festi pubbliċi.
• L-avvenimenti jistgħu jittellgħu fi kwalunkwe jum u jistgħu jeħtieġu sigħat twal.
• Sigħat addizzjonali jistgħu jkunu meħtieġa biex jintlaħqu l-ħtiġijiet ta’ dan l-irwol, speċjalment waqt l-avvenimenti tal-MICAS.
• Ir-responsabbiltajiet u l-interazzjonijiet meħtieġa għal din l-irwol mhumiex kompattibbli ma’ xogħol minn distanza.

L-applikanti eliġibbli se jiġu mistiedna għal intervista biex tiġi vvalutata l-adegwatezza tagħhom għal din l-irwol.

Il-kwalifikazzjonijiet u l-esperjenza mistqarra jridu jissostnew b’ċertifikati u/jew testimonjanzi, u kopji

tagħhom iridu jinhemżu mal-applikazzjoni flimkien mal-applikazzjoni. Iċ-ċertifikati oriġinali u/jew it-

testimonjanzi għandhom jintwerew għal verifikazzjoni waqt l-intervista.

Ir-riżultat tal-proċess tal-għażla se jiġi ppubblikat u mwaħħal fuq l-avviżiera tal-MICAS.

Il-persuni interessati għandhom jibagħtu email bl-aħħar Curriculum Vitae tagħhom, kopji taċ-

ċertifikati u portafoll flimkien ma’ ittra li tispjega kif il-ħiliet u l-esperjenza tagħhom jistgħu

jissodisfaw l-ispeċifikazzjonijiet ta’ din is-sejħa fuq people.micas@micas.art.

Id-data ta’ skadenza għall-applikazzjonijiet:  3 ta’ Novembru 2025.

Applikazzjonijiet li jaslu wara d-data u l-ħin tal-applikazzjoni (jiġifieri applikazzjonijiet tard) ma jiġux ikkunsidrati.

L-applikanti jingħataw sa jumejn (2) tax-xogħol wara d-data ta’ skadenza jew jumejn (2) tax-xogħol wara notifikazzjoni, liema hija l-aktar riċenti, biex iressqu kwalunkwe dokumenti neqsin, mhux korretti, jew mhux sħaħ.