L-Isfond

Il-Malta International Contemporary Art Space (MICAS) irid isaħħaħ l-infrastruttura kulturali ta’ Malta billi jipprovdi pjattaforma għall-arti kontemporanja u l-internazzjonalizzazzjoni. Malta se tkun qed tieħu pass importanti ’l quddiem permezz ta’ dan l-ispazju, u se ssir protagonista proattiva tad-dinja tal-arti kontemporanja.

Il-MICAS mhux biss se jkun vetrina għall-artisti kontemporanji lokali imma wkoll se jingaġġa ma’ istituzzjonijiet internazzjonali biex jippreżenta xogħlijiet innovattivi ta’ artisti rinomati minn madwar id-dinja.

Il-MICAS għandu l-għan li jenerġizza pożittivament l-ekoloġija kulturali ta’ Malta u jħalli impatt fuq ir-reġjun Ewro-Mediterranju li huwa jgħix fih. Il-missjoni tal-MICAS hija li jippromwovi l-arti kontemporanja billi joħloq kuxjenza pubblika lejn is-sinifikat tal-arti viżiva fuq il-ħajja kontemporanja, u billi jpoġġi fuq quddiem nett il-mod kif l-arti u l-artisti jikkontribwixxu għal kif niżnu u ninterpretaw id-dinja li ngħixu fiha.

Il-MICAS huwa proġett ta’ legat infrastrutturali mill-Gvern ta’ Malta għas-settur tal-Kultura u l-Arti.

L-Intenzjoni

Provvediment ta’ servizz ta’ kiosk tal-kafè mobbli fil-MICAS għal sitta u tletin (36) xahar bil-possibbiltà ta’ estensjoni tal-kuntratt għal erbgħa u għoxrin (24) xahar ieħor minn sena għal oħra.

Deskrizzjoni

Il-kiosk tal-kafè mobbli se tkun qed jopera mis-sit tal-MICAS f “Ospizio Complex”, Bieb il-Pulverista, Triq Joseph J Mangion, il-Furjana. Is-servizz għandu jingħata għal perjodu ta’ sitta u tletin (36) xahar li jibda mill-aħħar firma fuq il-kuntratt, bil-possibbiltà li jiġi estiż għal erbgħa u għoxrin (24) xahar ieħor minn sena għal oħra.

L-operatur tal-kiosk tal-kafè mobbli għandu jkun kompletament indipendenti minn kwalunkwe fornitur jew fornitur ta’ servizzi u għandu jaġixxi biss fl-interessi tal-klijent u fil-kisba tal-objettivi ddokumentati mill-MICAS.